قطع انترنت در اداره‌های دولتی به دستور رهبر طالبان

منابع به رسانه ها گفته‌اند که خدمات انترنتی شرکت دولتی «افغان تیلی‌کام» به دستور رهبر طالبان در تمام نهادهای دولتی متوقف می‌شود. بر اساس این دستور، کارمندان دولتی در اداره‌ها دیگر دسترسی به خدمات انترنت نخواهند داشت. منابع افزودند که این روند از ولایت‌های شمال کشور آغاز شده و حداقل از پنج روز پیش ارائه خدمات انترنت در اداره‌های دولتی این ولایت‌ها متوقف شده است. آن‌ها می ‌گویند که این اقدام باعث کندی کار و توقف بخشی از فعالیت‌های اداره‌های دولتی شده است و واکنش و نگرانی شدید کارمندان را برانگیخته است. طالبان و وزارت مخابرات زیر اداره آنان تاکنون در این باره اظهار نظر نکرده‌اند. افغان تیلی‌کام (AFTEL) شرکت مخابراتی دولتی است که خدمات ثابت، صوتی بیسیم و انترنت را تحت مجوز ۲۵ ساله در افغانستان ارائه می‌دهد. این شرکت متعلق به دولت بوده و توسط نهادهای دولتی اداره میشود. در سال ۲۰۰۵، وزارت مخابرات و تکنالوژی معلوماتی دولت پیشین، ضمن حفظ نظارت و کنترول، آن را به یک شرکت دولتی-خصوصی تبدیل کرد.