وزارت خارجه اوزبیکستان بازگرداندن هلیکوپترها و هواپیماهای نظامی ارتش پیشین افغانستان به گروه طالبان را تکذیب کرد و اعلام نمود که برخی رسانهها در این زمینه شایعهپراکنی کردهاند. احرار برهاناوف، سخنگوی وزارت خارجه اوزبیکستان، به رسانههای این کشور گفت: «گزارشهای منتشر شده صحت ندارد و هیچ تغییری در موضع رسمی اوزبیکستان به وجود نیامده است.» این تجهیزات نظامی همزمان با سقوط کابل و به قدرت رسیدن طالبان در ماه اسد سال ۱۴۰۰ به خاک اوزبیکستان و تاجیکستان منتقل شدند. طبق اعلام وزارت دفاع ایالات متحده، ۴۶ فروند هلیکوپتر و هواپیما به اوزبیکستان و ۱۸ فروند دیگر به تاجیکستان انتقال یافتهاند. پیشتر، عصمتالله ایرگاشف، نماینده ویژه اوزبیکستان برای افغانستان، تأکید کرده بود که این تجهیزات «متعلق به ایالات متحده» هستند و صرفاً با موافقت واشنگتن در خاک اوزبیکستان نگهداری میشوند. جاناتان هنیک، سفیر وقت امریکا در تاشکند، نیز اعلام کرده بود که این هلیکوپترها و هواپیماها به طالبان تحویل داده نخواهند شد. امیرخان متقی، وزیر خارجه طالبان، اخیراً از اوزبیکستان و تاجیکستان خواسته است تا این تجهیزات را بازگردانند و گفته که میتوان از آنها در عملیاتهای امدادرسانی پس از حوادث طبیعی مانند زلزله استفاده کرد. با این حال، تاکنون امریکا و کشورهای میزبان حاضر به تحویل این تجهیزات نشدهاند.
