د طالبانو د ریاستالوزرا اقتصادي معاونیت وایي چې د عامه اړیکو ریاست له لوري په هېواد کې د سوالګرۍ د مخنیوي په موخه د نړیوالو موسسو او مرستندویه بنسټونو له استازو سره د همغږۍ غونډه شوې ده.
د خبرپاڼې له مخې چې په غونډه کې د سوالګرۍ پر عواملو، دایمي او دوامداره حل لارو او د دې پدیدې پر وړاندې د طالب چارواکو د هڅو ترڅنګ د نړیوالو موسسو او مرستندویه بنسټونو پر ګډې همکارۍ خبرې شوې دي.
اقتصادي معاونیت لیکلي، د موضوع په اړه له تفصیلي بحث وروسته ټينګار شوی چې د سوالګرۍ کچې د راکمولو په موخه دې سوالګرو ته د حرفوي زده کړو، مشروطو نغدي مرستو او اقتصادي پياوړتیا له لارې دوامداره او باعزته معیشت رامنځته شي.
د ریاستالوزرا اقتصادي معاونیت د خبرپاڼې له مخې چې د نړیوالو موسسو او مرستندویه بنسټونو له استازو سره د دې پدیدې د ښه مدیریت په موخه د ریاست الوزراء اقتصادي معاونیت له لوري یوه جامع طرحه هم شریکه شوې چې د نړیوالو موسسو او مرستندویه بنسټونو له هرکلي سره مخ شوې ده.
د یادولو ده چې د طالبانو له بیاځلي واکمنېدو وروسته له ښارونو د سوالګرو د ټولولو لړۍ پیل شوې ده.



![[000098]](https://sedayedarya.tv/da/wp-content/uploads/sites/11/2026/08/000098-251x300.png)