مقامهای تاجیکستان میگویند که در سال ۲۰۲۵، درگیریهای مسلحانه و قاچاق مواد مخدر در مرز این کشور با افغانستان افزایش یافته است. ظفر صمد، رئیس اداره مبارزه با مواد مخدر تاجیکستان، در یک نشست خبری گفت که نیروهای امنیتی این کشور در سال ۲۰۲۵، ۱۷ درگیری مسلحانه با قاچاقچیان مواد مخدر در مرز افغانستان داشتهاند. به گفته او، در این درگیریها دو نیروی امنیتی تاجیکستان و ۱۰ شهروند افغانستان کشته شدهاند. او افزود که این رقم در سال ۲۰۲۴ تنها شش درگیری مسلحانه بوده و در آن سال سه قاچاقچی افغان جان باخته بودند. بر بنیاد اظهارات این مقام، میزان مواد مخدر کشفشده نیز در سال ۲۰۲۵ افزایش یافته و به ۲۷۴۲ کیلوگرام رسیده است؛ در حالی که این رقم در سال ۲۰۲۴ ۱۸۲۴ کیلوگرام بوده است. به گفته او، این آمار نشاندهنده افزایش نزدیک به یک تُن مواد مخدر کشفشده در یک سال است. رئیس اداره مبارزه با مواد مخدر تاجیکستان تأکید کرد که قاچاق مواد مخدر از افغانستان از مسیر تاجیکستان به کشورهای دیگر همچنان ادامه دارد.
